香蒜肉絲意粉

懶人意粉，十五分鐘上碟，自己煮一大碟慢慢嘆吧～ 

功課繁忙都忍唔住要同大家分享一下 <3！相信大家都知道香蒜肉絲意粉係某薄餅店歷久不衰既名物，雖然聽落好普通但係佢真係陪伴著我成長。材料簡單，價錢經濟實惠，準備功夫亦都唔多。蒜味香濃又美味，真係講起都流哂口水。懶人意粉，十五分鐘上碟，自己煮一大碟慢慢嘆吧～


材料：
意粉100G，火腿兩塊，豬肉碎半碗，雜豆半碗，蒜頭一瓣

調味料：
雞湯30ML，蒜粉，黑胡椒粉及海鹽


做法：
1）將豬肉碎以豉油、白胡椒粉、鹽和糖醃好，火腿切絲，蒜頭切粒
2）根據包裝指示時間減少一分鐘烹煮意粉以取Al dente口感
3）雜豆可與意粉同煮約兩分鐘一同放涼備用
4）用平底鍋以大火炒熟豬肉碎盛起，再下油以中火爆香蒜蓉及火腿絲，炒的同時倒入一半雞湯
6）加入意粉、豬肉碎和雜豆同炒再倒入剩餘雞湯，期間以大量蒜粉，黑胡椒粉及海鹽調味即成


小貼士：
a）如果想做到蒜味香濃，請瘋狂加入蒜粉以收最佳效果 :p :p :p
b）用雞湯可避免意粉炒得太乾身及炒燶，而且亦可減少鹽的份量

味噌醬烤茄子

味噌屬鹼性食物，可溫和喚醒神經系統，不含酸性咖啡因的刺激性。

味噌（MISOみそ ）或普遍稱為麵豉是一種偏鹹和具代表性的日本調味品。味噌的種類繁多，主要是原料的成分和比例不同。傳統製法是把大黃豆蒸熟後，加入海鹽調味後放入米麴、麥麴用木桶封存，通過黴菌、酵母菌發酵而製成。味噌以顏色而分，偏紅為「赤味噌」，偏黃為「淡味噌」，味噌發酵時間愈短，顏色愈淡；時間愈長，顏色也愈深。西方營養學角度指出，味噌是少數含有維他命B12的植物食品，可防治貧血。而且，味噌含有豐富的蛋白質，經發酵後會變成胺基酸，很容易被身體消化吸收。味噌屬鹼性食物，可溫和喚醒神經系統，不含酸性咖啡因的刺激性。可見，味噌不愧為健康的重要元素，今天我會以白味噌製作一道簡單的醬烤茄子，所需材料也可以各大超市容易買到，懶於入廚的你不要錯過呢！


材料：
中型茄子一條，青蔥一條，蒜蓉一茶匙，白芝麻粒一茶匙


調味料：
白味噌兩湯匙，味醂一湯匙，日本豉油一茶匙
蜂蜜一茶匙，胡麻油半茶匙，黑胡椒粉及海鹽酌量


做法：
1）茄子洗淨後用廚房紙印乾，將其分為兩份再打菱角切（小心別切破茄子皮）
2）將調味料和蒜蓉以一湯匙半水拌勻，塗在茄子上
3）把茄子放入預熱180度的焗爐，烤焗35-40分鐘至金黃色
4）灑上蔥花及白芝麻粒，即成


小貼士：
a) 時間許可的話，可用白鑊把蔥粒及白芝麻粒炒香，增添風味
b) 茄子切開後會迅速氧化變黑，手腳較慢的朋友可先進行步驟二
c) 嗜甜的可隨個人喜好調較蜂蜜的份量
 

宇治抹茶熱香餅

加入日本宇治抹茶粉增添風味，果然有另一種感覺噢。

返到黎英國又再次投入廚娘生活嚕，嘗試烹煮不同類型既菜式同甜點，希望大家繼續支持同捧場兔仔食堂嗚嗚＞＿＜如果大家有留意開，我之前上載過香蕉草莓熱香餅既食譜，唔知大家有無試做呢？今日我將上次既材料、份量、做法與步驟作出少量修改，加入日本宇治抹茶粉增添風味，果然有另一種感覺噢。熱香餅更鬆軟之餘，製作方法亦較上一次簡單方便呢～我地一齊睇下點樣做呢個香濃好味道既抹茶熱香餅啦！


材料（大約可做六塊）：
中筋麵粉半杯，泡打粉一茶匙半，宇治抹茶粉一湯匙，砂糖兩湯匙，雞蛋一隻，牛奶三分之一杯，油兩茶匙，鹽少許，牛油


配料：
青提子，楓葉糖漿


做法：
1）準備一個大碗倒入雞蛋、牛奶、油拌勻
2）將麵粉、泡打粉、鹽及砂糖分別緩緩過篩，用發蛋器拌勻至完全形成麵糊
3）用中火燒熱平底鍋，加入適量牛油，用廚房紙巾將牛油平均塗滿鍋上
4）倒入一殼麵糊（以一般淺身湯殼為準）
5）當熱香餅上出現氣泡時，反轉另一面，直至熱香餅輕微脹起便可上碟
6）不斷重複步驟五和步驟六，煎大約三塊熱香餅，便用剛才的廚房紙巾塗抹一次平底鍋以防沾鍋，待麵糊用完便大功告成


溫馨提示：
a）每當煎好一塊熱香餅後，將之一塊塊平放碟面，用濕了水的廚房紙巾覆蓋著他們以保持濕度
b）時間許可既話，建議先將麵糊放入雪櫃冷藏一小時，好讓麵糊有更長時間膨脹，增加其鬆軟口感
 

野菌牛肉意大利燴飯

飯粒軟稔中帶點煙韌，食落去既感覺同普通白飯唔同。

意大利燴飯（Risotto）係一道用高湯將米粒煮成味道濃郁的意大利經典料理。高湯通常會以魚、肉或者蔬菜為基底，一般意大利燴飯會加入忌廉、白酒以及洋蔥豐富整碟菜式既色香味，飯粒軟稔中帶點煙韌，食落去既感覺同普通白飯唔同。步驟看似繁複，其實十分簡單，只要有耐性，你都可以炮製出一碟美味可口既意大利燴飯呢 :P 傳統既意大利燴飯會加入忌廉，雖然口感非常軟滑但亦容易感到飽滯，所以呢份食譜就省略左忌廉喇 ;)


材料：
意大利米Arborio rice半杯，免治牛肉，蠔菇Oyster mushroom兩隻，鮮冬菇Shiitake mushroom四隻，洋蔥半個，巴馬臣芝士酌量，牛油，雞湯400ML


調味料：
白酒120ML，洋芫荽，鮮磨黑胡椒粒，海鹽，糖


做法：
1）先將洋蔥切粒，蠔菇切大片，鮮冬菇切細片
2）用另一個小鍋把雞湯加熱備用
3）中火燒熱平底鍋，加入適量橄欖油和牛油，炒香蠔菇及鮮冬菇，盛起備用
4）將免治牛肉及洋蔥粒炒至半熟，加入意大利米炒勻
5）轉中慢火倒進白酒，待所有酒精揮發及把水份收乾
6）分三次倒入雞湯，不斷翻炒避免黏底
7）直到意大利米吸收接近所有雞湯，再倒入下一次的雞湯，重複此步驟所需時間大約為二十分鐘
8）烹煮期間嚐試米飯的軟硬度，當適合自己的喜好便可熄火
9）拌入蠔菇和鮮冬菇粒，以黑胡椒粒、海鹽及糖調味，灑上洋芫荽裝飾即成


小貼士：
a）意大利米不用預先洗淨，直接倒進鑊中與雞湯同煮即可
b）洋蔥及菇菌無需炒至全熟，否則雞湯的熱力會使它們變得軟爛
c）如果選用會出水的雜菌如白菇，先炒一、兩分鐘待乾身後才下牛油炒洋蔥粒

香蕉草莓熱香餅

只要將熱香餅粉加上適當既水或牛奶混合，放到平底鍋上煎就完成。

熱香餅（Pancake）係一種以麵糊係烤盤或者平底鍋上烹飪製成既圓扁狀鬆餅，熱香餅會以烤盤單面煎烤，然後翻轉令另一面適當受熱。可麗餅（Crepe）就係一種極度細薄、面積較大既鬆餅，單面煎烤後捲起同裝餡。每個國家同地區既風俗習慣都唔同，好似英國咁早午餐時段都會供應熱香餅，口味變化多樣，最常會塗放奶油、果醬、水果、糖漿或肉食等配料。雖然市面上都有出售熱香餅粉，只要將熱香餅粉加上適當既水或牛奶混合，放到平底鍋上煎就完成。但係我始終覺得親手製作麵糊，隨個人喜好去調配材料多少先係最美味既，而且非常簡單方便，我地一齊睇下點整呢個香噴噴既香蕉草莓熱香餅啦


材料（大約可做十塊）：
中筋麵粉兩杯，粟粉三湯匙，泡打粉兩湯匙，砂糖四湯匙，雞蛋兩隻，牛奶一杯半，油兩茶匙，鹽少許，牛油


配料：
香蕉，草莓，楓葉糖漿，紅莓果醬，榛子醬，忌廉芝士


做法：
1）將麵粉、粟粉、泡打粉及砂糖分別緩緩過篩，然後用發蛋器拌勻
2）直接打入雞蛋拌勻，期間分兩次倒入牛奶，拌勻至完全形成麵糊
3）加入油和鹽至麵糊
4）用中火燒熱平底鍋，加入適量牛油，用廚房紙巾將牛油平均塗滿鍋上
5）倒入一殼麵糊（以一般淺身湯殼為準），用鑊蓋蓋上一分鐘
6）當熱香餅上出現氣泡時，打開蓋反轉另一面，再蓋上一分鐘至熱香餅輕微脹起便可上碟
7）不斷重複步驟五和步驟六，煎大約三至四塊熱香餅，便用剛才的廚房紙巾塗抹一次平底鍋以防沾鍋，待麵糊用完便大功告成


溫馨提示：
a）每當煎好一塊熱香餅後，唔好將佢地疊埋一齊，應該一塊塊平放碟面，否則熱香餅之間既濕氣會影響佢地既口感
b）時間許可既話，建議先將麵糊放入雪櫃冷藏一小時，好讓麵糊有更長時間膨脹，增加其鬆軟口感
c）配料當然係視乎個人喜好啦，食得哩d我就一於少理架喇，肥呢個字我真係唔識寫 嫌糖份高既朋友，可以嘗試整咸既熱香餅，將鹽同砂糖既份量調轉，配以炒蛋、火腿、菠菜或煙三文魚同食，一定別有一番風味呢

川式麻婆豆腐

麻婆豆腐講究麻、辣、鮮、燙、嫩、捆（豆腐完整不爛）、酥（肉末酥香）等獨特風味

麻婆豆腐係中國四川傳統名菜式之一，「麻」來自花椒，「辣」來自辣椒，突出左川菜中「麻辣」既特色。呢度菜式係清代同治初年，由成都市北郊一家名為「陳興盛飯舖」既飯店老闆娘陳劉氏所創。由於陳劉氏臉上長滿麻點，人稱陳麻婆，所以佢發明既燒豆腐就被稱為「陳麻婆豆腐」。後來，因為呢道菜廣受歡迎，食客多數唔知道其原始店名，而稱之為「陳麻婆豆腐店」。時至今日，麻婆豆腐流傳各地，亦有好多唔同既做法，但用料均大同小異。麻婆豆腐講究麻、辣、鮮、燙、嫩、捆（豆腐完整不爛）、酥（肉末酥香）等獨特風味，送飯一流


材料：
免治豬肉 / 免治牛肉 100G，滑豆腐一盒，薑蓉兩茶匙，蒜蓉兩茶匙，蔥花隨量


調味料：
雞湯400ML，辣豆瓣醬兩湯匙，豉油一茶匙，麻油一茶匙、辣椒油少許、鹽和糖隨量，生粉水


做法：
1）先把豆腐切成大方粒，然後慢慢置於水中灼一分鐘以辟走豆腥味
2）中火燒熱油鍋，將免治肉炒至半熟，盛起備用（無需倒油）
3）轉中小火炒香辣豆瓣醬，加入薑蓉和蒜蓉，聞到香味便加入免治肉續炒
4）倒入雞湯及豉油，轉中大火
5）當雞湯開始微滾後，豆腐回鍋慢煮三分鐘
6）倒入生粉水勾芡，將醬汁煮至濃稠，加入蔥花煮三十秒，最後倒入麻油、辣椒油和糖調味


小貼士：
a）因為我不太喜歡花椒既味道，喜歡四川風味的朋友可於起鍋後灑上花椒粒
b）由於辣豆瓣醬和雞湯已有一定既咸度，所以免治肉只需係烹煮時，稍以少許胡椒粉調味便可
c）如果擔心滑豆腐係烹煮既過程時煮爛而影響外觀，可以選用硬豆腐但口感會稍遜
d）豆腐回鍋後緊記慢慢推開，切勿大炒否則豆腐就會爛掉呢！:O

馬鈴薯甘荀煎蛋餅

馬鈴薯係一種非常實用且變化多端既食材。

今日就會為大家介紹健康美味既馬鈴薯甘荀煎蛋餅。馬鈴薯係一種非常實用且變化多端既食材，週末訓飽吃個brunch就最好不過喇～ 來來去去不外乎炒蛋多士，煎雙蛋沙嗲牛肉公仔麵，抑或白粥油條，中式點心等等，倘若想搞搞新意思，不妨考慮自己係屋企動手做，變換一下口味仲健康好多添 馬鈴薯煎餅係瑞士既家常菜，稱為Rösti，做法非常簡單。薯仔刨成細絲或粗絲均可，網上說法就係細絲為荷蘭式、粗絲為瑞士式、小塊狀為美式。我個人不太喜歡單調既煎餅，於是加入兩隻雞蛋有助增加黏糊性同香味，額外加左兩種配料（甘荀和香蔥）。大家可以選擇直接煎薯餅或添加其他配料，做法不拘，更別有另一番風味呢


材料：
馬鈴薯一隻，甘荀一根，雞蛋兩隻，香蔥一段，中筋麵粉一湯匙，粟粉一湯匙


調味料：
鹽適量，黑胡椒適量

做法：
1）馬鈴薯洗淨去皮與甘荀分別切成幼絲，燙兩分鐘，瀝起備用
2）一併把雞蛋，麵粉，粟粉，蔥花，馬鈴薯和甘荀拌勻，撒上鹽及黑胡椒調味
3）燒熱平底鍋倒入橄欖油及麵糊，用鍋鏟或湯匙整成扁平的圓形
4）方便翻面，用切割法把麵糊分成四、六或八等份
5）用中火慢煎到兩面金黃色即成，可沾上沙律醬一同食用


小提示：
a）麵粉與粟粉亦可以只使用其中一種，若果全用麵粉煎餅就會稍為硬挺，全用粟粉餅身則較軟
b）要耐心地用中火慢慢煎，不要急啊！用油量會比平常多，煎餅焦黃程度視個人喜好而定，喜歡酥脆口感既朋友就煎耐一點吧～
c）西式做法可以用芝士代替蔥花，韓式則可轉用泡菜
d）想當作正餐或Party food，可以隨意加入各種配料如洋蔥、煙肉、火腿絲、粟米粒、蟹柳絲、豬肉碎更添滋味 要注意配料唔好過多，避免搶去薯香同時亦較難控制呢！

鮮奶燉蛋

製作燉蛋講求蛋同水份既比例，以及火力與時間既掌握。

從來都鐘情於中式甜品，最愛的都是熱烘烘的磨糊，所有乜糊物糊均無一不歡 留學英國儀器同材料所限，唯有整一個冷熱食用均可既鮮奶燉蛋溫暖自己既思鄉之情哈哈！製作燉蛋講求蛋同水份既比例，以及火力與時間既掌握。


材料：
雞蛋一隻，鮮奶120ML，砂糖兩茶匙


做法：
1）雞蛋置回室溫，用叉發勻
2）將冰凍的鮮奶加入砂糖，隔熱水助暖，將兩者攪拌至完全溶解
3）把鮮奶倒進蛋液拌勻
4）用湯羹清除蛋液面的泡沫，如果追求更幼滑口感，可將混合物過篩緩緩倒入另一個小碗中
5）蓋上錫紙，水滾後以中火隔水蒸十二分鐘至十四分鐘，即成


溫馨提示：
a）以上係微甜版本，大家可以隨著個人喜好加減糖既份量
b）你可以選擇將鮮奶放入微波爐一分鐘或以小火稍微加熱。緊記！無需煮至大滾，僅溶到砂糖為大前題，否則牛奶會將蛋黃煮熟，撞成蛋花架喇
c）要做到口感嫰滑，火候控制好重要，千其唔好貪快用大火啊，否則有氣孔外觀唔平滑之餘，仲會影響口感添～

SMOOTHIE 心得

只要無農藥殘留，我地可以連皮帶肉一齊打成果汁架，因為最有營養既部分就係靠近果皮既地方！

有留意開我Instagram既朋友，都知道我有自己榨果汁既習慣
其實市面上有好多不同款式既食品處理器，到底佢地又有咩分別呢？


攪拌機 Blender：
最普遍既食品處理器，一般家庭都會購入。應用係打果汁上，針對多汁及軟身既蔬果，如西瓜、士多啤梨等。攪拌機會將水果攪成果蓉且留有渣滓，飲用時會咀嚼到果肉，製成品稱為果泥，亦即店舖經常售賣既smoothie喇 如果你屋企個部係攪拌器而你又覺得難以入口，可以過篩隔走渣滓，或者用豆漿濾網打汁，不過多左呢d步驟就唔怕再食到果蓉啦。我偏好使用攪拌機打汁，鍾意佢飲落夠RAW夠ORGANIC感覺好FRESH～ 製成品如木瓜鮮奶，水果奶昔，沙冰等。


榨汁機 Juicer：
只有單一榨汁功能，針對唔多汁或堅硬既蔬果，如蘋果、紅蘿蔔等。如果追求滑不溜口既朋友，榨汁機必定係你地既不二之選。榨汁機會自動隔渣，只會輸出純果汁。由於佢專責一項工作，性能同效果相對較佳，一般會較昂貴。製成品如橙汁，蘋果汁，五青汁等。


聽朋友講，佢地選擇比貴少少係街買黎飲係因為無辦法存放咁多款式既蔬果，堅果去製作果泥，其實，只要持之以恆，榨果汁唔係一件麻煩事呢～ 等我今日同大家分享自己少少既心得啦


水果打成果汁後，仍含有一樣的營養價值嗎？
妨間好多人會好似我咁，為左同時吸取更多營份而將幾種蔬果打成果汁飲用。醫生經常提出將新鮮蔬果打汁後令營養流失既潛在隱憂，果汁與空氣既接觸面積變大，加速氧化而破壞其中既酵素。若果，較堅硬既蔬果不易食用或者直接生食味道總係怪怪青澀的，果汁亦係相當便利既方法，除左可以增加多種蔬果營養來源既攝取之外，亦可以針對個人較為缺乏既營養去作出調整，以獲取身體特別所需既養分。建議最好自己打，唔好買一般市面上販售既果汁啊！佢地為左令到口感滑溜，大多會添加過多既糖份（如雪糕、高脂乳酪）、香料等人工添加劑，或有利保存既防腐劑。從而對人體增加負擔，導致熱量攝取過多。若你買既為新鮮現打既果汁，都要注意其中含糖量既多寡啊！


只要無農藥殘留，我地可以連皮帶肉一齊打成果汁架，因為最有營養既部分就係靠近果皮既地方！建議盡量唔好將果渣倒走，雖然口感可能無咁爽，但裡面就含有最多如膳食纖維等珍貴營養，有效減少有害物積聚，並可以舒緩飯後血糖升高，有助控制膽固醇。如果果汁以酸性水果為基底，我一般會搭配較甜既水果（如蘋果、藍莓等）或以天然食材（如蜂蜜）中和。相反，如果果汁以較甜既水果為主要，加入greek yogurt或檸檬汁都可以調整味道。有人會覺得香蕉既熱量同糖份較高或容易令人肚漲而避免加入，你可以選擇牛油果、木瓜、無花果、菠蘿、燕麥片、無糖果仁醬等去代替香蕉，果汁既濃稠度就會提高，味道亦有所提升～ 總括而言，果汁仍舊無法取代直接食用水果所得到既營養，不過亦不失為一個較便利吸取各種維生素既方法呢


唔知大家最鍾意既smoothie combination又係邊幾種呢？
不妨係下面留個言話我知啦～

吞拿魚菠菜汁煮意粉

菠菜含有豐富纖維、鐵質同葉酸，營養價值相對較高。

食得西餐太多感覺好肥膩，離不開茄醬、忌廉、煙肉、牛油，全部都係高脂食物，愈肥膩愈好食，對於追求健康既朋友，有時都係望梅止渴較好 :X 平日行超市都會見到琳琅滿目既現成意粉醬。雖然係方便又快捷，但係通常佢地聞落係好香啊，食落又無乜味，最後可能又要搞一大輪繼續調味 :/ 煮意粉唔一定淨係得白汁忌廉同番茄肉醬咁寡既，有時外出用餐，菠菜汁意粉絕對係一個好選擇，感覺上食多左蔬菜較健康。不如嘗試一下自己親手製造醬汁，無添加防腐劑，採用最新鮮既材料，而且菠菜含有豐富纖維、鐵質同葉酸，營養價值相對較高。好啦今日同大家跳出框框，做個自家製菠菜汁，好味又健康！


材料：
意粉100g，油浸吞拿魚一罐，菠菜一碗，羅勒葉一棵
牛奶70 ML，蒜頭，松子仁，巴馬臣芝士少量


調味料：
橄欖油半湯匙，黑胡椒粉，海鹽及糖酌量


做法：
1）意粉烹煮時間比包裝建議少兩分鐘以取Al dente口感
2）用小火烘松子仁至金黃色，壓碎備用
3）用中火略炒香蒜頭
4）先把菠菜，牛奶，蒜頭及巴馬臣芝士一併倒入攪拌器，完成後再加入調味料拌勻
5）重新開鑊，中小火炒開吞拿魚，加入意粉及菠菜汁，見開始煮熱期間可以加海鹽增添咸度
6）上碟後灑上松子仁碎及芝士即成


小貼士：
a）羅勒葉會係加熱過程中逐漸失去香味，可以係步驟五加上切好既羅勒葉
b）如果想醬汁較為濃稠，一湯匙麵粉加水撈勻，倒入穫裡面便可
c）番茄與Pesto產生一種奇妙的化學作用，兩者一齊食非常搭啊！8-)
d）隨著個人喜好去選擇配料，唔中意食吞拿魚既朋友可以加雞肉或者大蝦都一樣咁滋味架

上海紅燒肉

紅燒肉香氣濃郁，絕對係一道很好下飯既菜式。

紅燒肉（Braised Pork Belly）係一種主要以肥豬肉及醬油為主的中國傳統菜式，除左豬肉外仲可以用其他肉類作為主要用料。基本上，中國唔同地方都會有佢地當地獨特既製作方法同風格，配料亦非常多樣化。由於紅燒肉香氣濃郁，絕對係一道很好下飯既菜式，話咁快就食左幾啖停唔到口呢～不過佢既特色就係在於肥肉多於瘦肉，所以脂肪含量亦相對較高，不宜常吃，少食多滋味 ; )


材料：
帶皮五花腩一斤，蒜頭兩瓣，薑四片，八角三顆，紅蔥頭兩顆，蔥兩段


調味料：
豉油兩湯匙，老抽一湯匙，紹興酒兩湯匙，紅糖酌量，雞湯一杯


做法：
1）燒開半鍋水，將五花腩切件用加薑片汆水兩分鐘
然後用清水把五花腩清洗乾淨，以洗走血水和豬膻味
2）用油一併爆香蒜頭，薑片，八角和紅蔥頭，見少微金黃色盛起備用
3）無須洗鑊，用小火以剛才剩下的油添上紅糖煮微熱，放入五花腩
上色後把爆好的料頭回鍋兜炒
4）加入豉油，老抽，紹興酒及水，份量為必須蓋過五花腩
5）轉明火，重新滾起後轉回中小火，蓋好炆煮
6）每十五分鐘把肉反面，來回分別四次共一小時
期間觀察收水情況，然後隨量加入雞湯以免炆乾
7）將近完成時放入蔥段，熄火，即成


小貼士：
a）由於五花腩會在炆煮過程中縮小，所以切記要將佢地切成較大既形狀，如果唔係五花腩係炆煮後會散開，做唔到啖啖既效果啊 :P
b）不同爐頭均有不同的火候程度，所以隔十五分鐘去check係好重要架！炆到燶哂就唔好啦！
c）若果係英國留學既朋友們，家中可能會缺少紹興酒亦無問題啊～學期尾喇千萬不要捧一大枝回家喇！